星期五突然有半日假放, 好開心啊! 但都有不少趣事:

我喺中環返工, 我同阿姐2點鐘出去食飯 (因公司比較free, 我地可以決定幾點食飯,因中環1-2點超多人,所以我地通常2點食飯), 我地2點半食完,就收到人事部同事電話(我諗佢打咗好多次先打得通我手提) , 話已掛咗8號, 可以撤退!

我同阿姐梗係拿拿淋返公司, 但阿姐有重要野要做, 所以我就走先! 喺中環, 就面對第一個人生交叉點: 去中環站 定 香港站 好呢??? 經驗話我知, 地鐵站一定超多人, 無得坐, 咁要企就梗係揀條快啲既東涌綫啦! 去到香港站,超多人, 我諗荃灣綫仲多人, 我等4號月台, 點知2班車都入咗3號月台, 我即刻轉軚排4號月台, 即刻上倒車!

喺車上, 企我隔離既太太, 拎住把遮, 一袋野, 抱住個約2歲既女, 個女揹住個書包仔訓著咗, 係訓著咗, 於是個阿媽就好論盡, 又要拎野, 又要抱住個女, 喺附近既人都好幫手, 有位小姐幫佢拎住袋野, 落車時俾返佢, 有位先生話嗰位太太可以捉住佢隻手當扶手, 而我呢~~~ 右手捉住地鐵扶手, 左手捉實嗰位太太, 因為地鐵有時好 "chok",  我怕佢跌親, 好彩佢都無驚無險去到目的地-南昌站, 佢仲不斷咁多謝我地添!  其實我有諗過大聲叫 "請問有無人可以讓個位俾抱住 BB既太太坐呀?" 但我太細膽啦, 最後都無叫出口, 好彩位太太最後都平安無事, 祝佢事事平安!

其實我覺得佢真係一位好堅毅既太太, 佢無抱怨過, 只係默默咁堅持, 堅持到目的地, 佢個女就訓到好冧, 佢個女好幸福呢!

另一件事都係喺地鐵車廂發生既, 話說我未出手扶住位太太時, 我左手拿住份頭條日報, 咁我準備出手扶住位太太, 就要收返好份報紙架啦! 點知,我將份報紙放入袋時, 唔小心夾埋後面個男人條呔, 直到人地叫 "小姐! 小姐!", 我先知佢條鮮艷既黃色領呔俾我夾住, 袋埋入袋, 我梗係say sorry啦, 唔知佢有無俾我勒親呢????!

最後, 去到葵芳站, 等巴士返屋企, 嘩~~~~ 嗰條人龍, 無4架車都走唔哂, 等咗10分鐘都無車, 我做咗個好英明既決定-----------行路返屋企! 我朋友P小姐住我隔離樓, 佢仲聰明, 佢喺葵興站落車, 行少好多路! 我行咗25分鐘就去到商場附近, 仲去咗食下午茶, 租埋碟先施施然返屋企添!

喺電視上見到陸上交通好混亂, 希望各大公共交通機構下次會做得更好啦!  

我呢一刻好期待今晚去 wet, 遲啲會出blog 架嘞!